ТОШКЕНТ, 29 июл – Sputnik. Қозоғистон президенти Касим-Жомарт Тоқаев мамлакатдаги карантин чекловларини кейинчалик босқичма-босқич юмшатиш шарти билан яна икки ҳафтага узайтиришга кўрсатма берди. У бу ҳақда бугун Акордада ўтказган йиғилишда маълум қилган.
"Июл ойида жорий этилган чеклов чораларининг ижобий таъсирини янада кучайтириш ҳамда Қозоғистон ва қўшни давлатлардаги эпидемиологик вазиятнинг мураккаблашуви эҳтимолини ҳисобга олган ҳолда, Касим-Жомарт Токаев давлат комиссиясига кейинчалик босқичма-босқич юмшатиш шарти билан карантин тадбирларини икки ҳафтага узайтиришга кўрсатма берди", - дейилади Акорда сайтидаги баёнотда.
Қозоғистонда ўтган бир сутка давомида коронавирусни юқтирганлик бўйича 1 544 та ҳолат қайд этилган, касалланганларнинг умумий сони 86 192 нафарга етган.
Соғайган беморлар сони 56,6 мингдан зиёдни ташкил этади. Қурбонлар сони эса 793 нафар.