ТОШКЕНТ, 29 апр - Sputnik. Ўзбекистонда 9 майда нишонланадиган Хотира ва қадрлаш байрами карантин режими туфайли оммавий тадбирларсиз ва байрамона маросимларсиз ўтказилади, деб хабар берди РИА Новости мамлакат Вазирлар маҳкамаси қошидаги тезкор штабга таянган ҳолда.
"Махсус комиссия карантин тадбирлари туфайли Хотира ва қадрлаш кунида мемориал ва қабристонларга оммавий гулчамбар қўйиш маросимларини чеклашга қарор қилди", - дея маълумот берди тезкор штаб вакили.
Унинг сўзларига кўра, 9 май байрамига тайёргарлик тўхтаб қолмаган, балки ҳаётга татбиқ этилишда давом этмоқда. Хусусан, Тошкент туманларининг бирида Иккинчи Жаҳон урушида қозонилган Ғалабанинг 75 йиллигига бағишланган Ғалаба боғининг очилиш маросимига тайёргарлик олиб борилмоқда.
"Республикада жорий этилган ўз-ўзини яккалаш тартиби муносабати билан Россия элчихонаси бу йил Ғалаба кунига бағишланган, хусусан уруш ва меҳнат фахрийлари иштирокидаги тадбирларни ўтказмайди", - деб маълум қилган РИА Новостига дипмиссия матбуот-хизмати.
Бу қарор энг аввало кекса инсонлар саломатлиги тўғрисида қайғурган ҳолда қабул қилинган.
Сал олдин Ўзбекистондаги Россотрудничество ваколатхонаси ўзининг Telegram-каналида "Ўлмас полк - чегара билмайди" акциясини онлайн тарзда ўтказиш бўйича Россия ватандошлари бутунжаҳон мувофиқлаштириш кенгаши томонидан илгари сурилган ташаббусни қўллаб-қувватлашини маълум қилган эди.
"Ғалабани чизамиз" деб номланган болалар орасида ўтказиладиган суратлар танлови ҳам худди шундай форматда ўтказилади.