ТОШКЕНТ, 30 мар - Sputnik. Адлия вазирлигида давлат рўйхатидан ўтказилган низом билан карантин даврида боғча боласи ота-онасига меҳнат таътили бериш тартиби тасдиқланди.
Низомга кўра, меҳнат таътили карантин даврида боғчалар ва мактаблар фаолияти тўхтатилган даврда боғча тарбияланувчисининг ва мактаблар 1-4-синф ўқувчиларининг ота-она (уларнинг ўрнини босувчи шахс, васий, ҳомий)сига берилади.
Бунда, таътил ходимнинг хоҳишига кўра, таътиллар жадвалидан қатъи назар берилади.
Агар ходим боғча ёки мактаб фаолияти тўхтатилишидан олдин меҳнат таътилини олган бўлса ёки меҳнат таътили олишни хоҳламаса унинг розилиги билан қуйидагилар амалга оширилиши мумкин:
- масофавий иш усули, мослашувчан иш графиги ёки уйда ишлашга вақтинча ўтказиш;
- иш ҳақи сақланмаган таътил бериш.
Иш берувчи ходимдан меҳнат таътилига чиқиши ҳақида ариза олган куни таътилнинг бошланиши ва тугаш санасини кўрсатган ҳолда буйруқ чиқаради.
Таълим муассасаларида карантин давом этиши муносабати билан меҳнат таътили тугаган кун ишга чиқишни иложи бўлмаганда, ходим иш берувчи номига қуйидаги мазмундаги аризани юборади:
- муддати ва бошланиш санаси кўрсатилган иш ҳақи сақланмаган таътил олиш бўйича;
- масофавий иш усули, мослашувчан иш графигида ёки уйда ишлашга вақтинча ўтказиш бўйича.
Иш берувчи ходимга аризасида кўрсатилган санадан бошлаб иш ҳақи сақланмаган таътил беришга мажбур, Меҳнат кодексида белгиланган максимал муддат бўйича чекловлар карантин даврида татбиқ қилинмайди.