ТОШКЕНТ, 17 мар - Sputnik. “Facebook” интернет ижтимоий тармоғида Миллий гвардия ходимларидан қочган ва 2 ҳафта ўтгач жасади топилган фуқаро ҳақида хабар тарқалди. Бош прокуратура матбуот котиби ушбу ҳодиса юзасидан суриштирув ўтказилаётганини маълум қилди.
Хабарда ёзилишича, “Facebook” интернет ижтимоий тармоғида жорий йилнинг 14 февраль куни Тошкент шаҳар, Яккасарой тумани, Шаршара кўчасида Миллий гвардия ходимлари бир нафар ҳуқуқни муҳофаза қилувчи идора ходими деб тахмин қилинаётган шахснинг ортидан қувганлиги, сўнг у ўзини Бўрижар каналига ташлаганлиги ва орадан 2 ҳафта ўтгач ушбу каналдан унинг мурдаси топилганлиги ҳақидаги хабар тарқалган.
Ҳозирда мазкур ҳолат юзасидан прокуратура органлари томонидан терговга қадар текширув ҳаракатлари ўтказилмоқда.