ТОШКЕНТ, 27 дек – Sputnik. Нукус гарнизони Маънавият ва маърифат маркази ҳарбий оркестри жамоаси Қорақалпоғистон Республикаси ва Хоразм вилояти аҳолисига Янги йил тароватини ҳадя этишни бошлади. Бу ҳақда Шимоли-ғарбий ҳарбий округ матбуот хизмати маълум қилди.
Якунланиб бораётган йилнинг 24 декабридан бошлаб Нукус гарнизони Маънавият ва маърифат маркази ҳарбий оркестри жамоаси Қорақалпоғистон Республикаси ва Хоразм вилояти аҳолисига ўз кўнгилочар дастурлари ва мусиқий шоуларини тақдим этишни бошлади.
Улар томонидан қизиқарли томошалардан бири биринчи бўлиб Нукус шаҳридаги “Korzinka.uz” кўнгилочар-савдо мажмуаси олдида, Янги йил арчаси ўрнатилган майдонда намойиш этилди.
Ҳарбий оркестр томонидан ижро этилган классик ва миллий куйлар йиғилганларга байрамона кайфият улашмоқда.
Шунингдек, Нукус гарнизони Маънавият ва маърифат маркази ҳарбий оркестри жамоаси ташаббуси билан бу йилги байрам шоу дастурига Янги йил байрами бош қаҳрамони бўлган – Қорбобо бир неча Қорбоболар тимсолида киритилган.
Ушбу Қорбоболар ўзларининг ўша таниш либосларида турли санъаткорона маҳоратларини намойиш этиб, байрам томошасига тўпланганларни хайратга солишмоқда.
Бу эса байрам шукуҳига ўзгача кўтаринкилик бағишламоқда.