ТОШКЕНТ, 13 дек - Sputnik. ЮНЕСКО “Лазги” рақсини Инсоният номоддий бойлиги рўйхатига киритди, деб хабар қилди бош вазир ўринбосари Азиз Абдуҳакимов.
Хоразмнинг “Лазги” рақси Ўзбекистон маданий бойлиги элементи сифатида ЮНЕСКОнинг Инсоният номоддий бойликларининг Репрезентатив рўйхатига киритилди, - дейилган хабарда.
Ушбу қарор ЮНЕСКОнинг номоддий бойликларни қўриқлаш ҳукуматлараро қўмитасининг Колумбия пойтахти Боготада бўлиб ўтган 14-сессиясида қабул қилинган.
Ушбу анжуманда Ўзбекистоннинг ЮНЕСКОдаги элчиси У.Шадиев бошчилигидаги Ўзбекистон делегцияси иштирок этган. Тадбир доирасида “Лазги” рақсининг презентацияси бўлиб ўтган. Шунингдек Ўзбекистонда мавжуд бошқа номоддий бойликлар, хусусан “Бахшичилик” санъати ҳамда миллий кураш услубларини ҳам ЮНЕСКО рўйхатига киритиш бўйича таклифлар билдирилган.