ТОШКЕНТ, 8 дек — Sputnik. Қозоғистоннинг Ақтобе шаҳрида ўзбекистонликлар учун муддатидан аввал овоз бериш ташкиллаштирилади. Бу ҳақда Ўзбекистон Ташқи ишлар вазирлиги матбуот хизмати хабар қилди.
4-5-декабрь кунлари Ўзбекистоннинг Ақтау шаҳридаги бош консули Нодир Тургунов Ақтобе вилоятида бўлди.
Ташриф доирасида қатор учрашувлар, жумладан, вилоят ҳокими ўринбосари Кайрат Бекенов, вилоят полиция департаменти ва сайлов комиссияси раҳбарияти билан музокаралар ўтказди.
Томонлар муддатидан олдин овоз беришни 14-15-декабрь кунлари соат 10.00дан 13.00гача Ақтобе шаҳри, Санқибой ботир кўчаси 20-А уй мазилида ўтказишга келишишди.
Ўзбекистонда Парламент сайловлари 2019 йилнинг 22 декабрида бўлиб ўтади. Парламентдаги 150та ўринга мамлакатда фаолият юритувчи бешта партиялар томонидан илгари сурилган 750 номзод даъвогарлик қилмоқда. 18 ноябрдан сайловолди ташвиқотларига старт берилган.