ТОШКЕНТ, 1 дек — Sputnik. Сурхондарё вилояти Термиз туманидаги Учқизил темир йўл станциясида террорчилар томонидан темир йўл транспортида гаровга олинганларни озод этиш ва террорчиларни зарарсизлантириш бўйича махсус-тактик ўқувлари ўтказилди. Бу ҳақда Миллий гвардия матбуот хизмати Sputnik Ўзбекистонга маълум қилди.
Тадбир Ички ишлар бошқармаси, Фавқулодда вазиятлар бошқармаси ва Давлат хавфсизлик хизмати бошқармаси ҳудудий бўлинмалари билан ҳамкорликда ўтказилган.
Бўлинмалар сунъий тўсиқлар муваффақиятли забт этишд, даставвал юзага келган вазиятни тинчлик йўли билан ҳал этиш мақсадида, “террорчилар” билан музокаралар олиб боришди. Музокаралар ижобий натижа бермагач, уйғунликдаги ҳаракатлар натижасида ишғол қилиш орқали гаровдагиларни озод этиш ва шартли террорчиларни зарарсизлантиришга эришилди.
Мазкур ўқувдан мақсад ҳуқуқни муҳофаза қилувчи ва давлат бошқаруви органларининг ҳамкорликдаги бажариладиган вазифаларини мувофиқлаштириш, бўлинмаларнинг амалий кўникмаларини ошириш ҳамда ностандарт вазиятларда тўғри ва оқилона қарор қабул қилиш хусусиятларини мустаҳкамлашдан иборат бўлган.