ТОШКЕНТ, 19 окт - Sputnik. Миллий гвардия ҳарбий хизматчилари Тошкентдаги Анҳор каналида чўкаётган аёл ҳаётини сақлаб қолдилар, деб хабар берди Sputnik Ўзбекистон мухбирига Миллий гвардия ахборот хизмати вакили.
Ҳодиса 18 октябрь куни соат 20:40 лар чамаси рўй берган. Анҳор каналида чўкаётган аёлни кўриб, Туркистон санъат саройи атрофида жамоат тартибини сақлаш бўйича хизмат вазифасини ўтаётган Миллий гвардия ҳарбий хизматчиси сержант З.Эргашев ва унинг шериклари жабрдийдага ёрдамга шошилганлар.
Ҳарбийлар тезкорлик билан аёлни сувдан олиб чиқишган. Жабрдийда қашқадарёлик, 1980 йилда туғилган Ю.Х эканлиги айтилмоқда. У ҳозирда шифохонага ётқизилган.
Шайҳонтоҳур тумани ички ишлар ходимлари томонидан ҳодиса юзасидан суриштирув ишлари олиб борилмоқда.