ТОШКЕНТ, 17 окт - Sputnik. Марказий банкнинг аҳоли ва корхоналар ўртасида 2019 йил 3-квартали бўйича ўтказган сўров натижаларига кўра, ўзбекистонликлар нархларда қандай ўзгаришларни кутаётгани аниқланди.
Маълум бўлишича, аҳолининг кўпчилиги товар ва хизматлар нархларининг кўтарилишига тайёрланмоқда. Миллий валюта заифлашгани ва бюджет секторида ойлик маошларининг навбатдаги индексацияси асосий омиллар сифатида кўрсатилган.
Миллий валютага ишонч июлга қадар мустаҳкамланиб келган бўлса, августда ўзбек сўми қулаганидан сўнг, кутилган валюталар курси бир неча минг сўмга ошди. Йил сўнгига келиб, доллар ошиши юзасидан аҳолининг қилган тахминлари 9 837 сўмга, ишбилармонларнинг эса 9 895 сўмгача етганини кузатиш мумкин.
Сўровда Ўзбекистоннинг барча вилоятлари ва Қорақалпоғистон Республикасидан 900 нафар жисмоний ва 375 нафар юридик шахс иштирок этган. Респондентлар Марказий банк томонидан тақдим этилган саволларга 2019 йилнинг 3-квартали давомида жавоб бериб келган.