ТОШКЕНТ, 23 сен - Sputnik. Россиянинг Санкт-Петербург шаҳридан Ўзбекистоннинг Наманган шаҳрига парвозни амалга ошираётган самолёт Самарада фавқулодда қўнишга мажбур бўлди. Бу ҳақда РИА Новости хабар қилди.
Қайд этилишича, учувчилар йўловчилардан бирининг тоби қочиб қолгани сабаб қўнишга мажбур бўлишган. У6 2509 рейси Курумоч халқаро аэропортига фавқулодда қўнган.
“Фавқулодда қўнишнинг сабаби – самолёт бортида бўлган 1988 йилда туғилган, гипертония (қон босимининг ошиб кетиши) хасталигидан азият чекувчи Ўзбекистон фуқаросининг аҳволи ёмонлашгани”, - дейилади хабарда.
Йўловчи аёлга зарурий тиббий ёрдам кўрсатилган ва зудлик билан шаҳар касалхоналаридан бирига ётқизилган.
Хабарда фавқулодда қўнган самолёт парвозни давом эттириш учун учиб кетганлиги қўшимча қилинган.