ТОШКЕНТ, 4 сен - Sputnik. Ўзбекистон Ташқи ишлар вазири ўринбосари Дилшод Ахатов Япония парламенти вакиллар палатаси депутатлари Фумиаки Кобаяши, Ясутака Накасоне, Таро Ҳонда ва Япония Либерал-демократик партияси Демократик сиёсат тадқиқот институти илмий ходимлари билан учрашди. Бу ҳақда ТИВ хабар қилмоқда.
Қайд этилишича, учрашув чоғида бўлажак олий даражадаги учрашувларга тайёргарлик кўриш нуқтаи назаридан икки томонлама муносабатларнинг турли жиҳатлари ва истиқболлари кўриб чиқилган.
Яқин парламентлараро алоқаларнинг кўп қиррали Ўзбекистон – Япония мулоқотини кенгайтириш, турли соҳаларда қўшма лойиҳалар ва дастурларни амалга оширишдаги муҳим роли эътироф этилди.
Эслатиб ўтамиз, аввалроқ Абдулазиз Камилов ва Япониянинг махсус вакили Ҳидеки Уяма билан бўлажак олий даражалардаги учрашувларни муҳокама қилгани хабар қилинган эди.