ТОШКЕНТ, 14 авг – Sputnik. 15 августдан бошлаб Тошкентда автобус ва метрода йўлкира нархи 1400 сўмни ташкил этади. Агар фоизда ҳисобланса, йўлкира ҳақи 16,7 фоизга ошади. Ойлик йўлкира карточкаларининг нархи ўзгармайди, деб хабар қилди Тошкент шаҳар ҳокимлиги матбуот хизмати.
Транспорт вазирлиги ва Тошкент шаҳар ҳокимлиги автобус ва метрода йўлкира ҳақини 16,7 фоизга ошириш ҳамда уни ҳар бир сафар учун 1400 сўм миқдорида белгилаш ҳақида таклиф киритган. Бунда ойлик йўл карточкалари нархини ҳозирги даражада сақлаб қолиш тўғрисидаги қарорга келинган.
Иш ҳақининг ошиши ва ёқилғи ҳамда эҳтиёт қисмлари нархларининг кўтарилиши, шунингдек, аҳолининг ижтимоий ҳимоясини таъминлаш ва шаҳар транспортида йўқотишларни камайтириш бўйича маълумотларнинг таҳлили натижасида Молия вазирлиги таклиф этилган тарифларни тасдиқлади.
15 августгача йўлкира ҳақи 1200 сўмни ташкил этган бўлиб, ушбу тариф 2016 йил апрель ойида ўрнатилган, ўшанда ҳам йўлкира нархи 200 сўмга кўтарилганди.