ТОШКЕНТ, 5 авг - Sputnik. Ахборот ва оммавий коммуникациялар агентлиги раҳбари Комил Алламжонов Alter Egо᾽га берган интервьюсида у президент матбуот хизмати раҳбари сифатида ишлаган вақтида Шавкат Мирзиёевнинг одатий иш куни қандай кўринишда бўлгани тўғрисидаги саволга жавоб берди.
Унинг маълум қилишича, президентнинг иш куни у учун тайёрлаган дайжестлар, турли хил маълумотномалар билан танишишдан бошланади, кейин қабуллар, учрашувлар, йиғилишлар, жадвал бўйича бошқа тадбирлар билан кечади.
“Эрталаб соат 9-9:30 да иш бошланади ва қачон тугаши номаълум. Биз доим: “Ўзингизни эҳтиёт қилинг, жуда кўп ишлаяпсиз”, деб кўп айтардик. Кун шу ишлар билан давом этарди ва биз уйга жуда кеч қайтардик, дам олиш кунларисиз ишлардик”, - дейди Алламжонов.
Суҳбатдошининг нега дам олиш кунларисиз, деган саволига: “Менимча, йиғилиб қолган муаммолар тинчлик ва бўшашишга имкон бермасди”, - дея жавоб қайтарди.
Алламжонов бу савол энергия билан боғлиқлиги, дарҳақиқат, ҳаммани президентнинг бунчалар серғайрат инсон эканлиги ҳайратлантиришини таъкидлади.
“Биз уларнинг ортларидан улгуролмасдик. Президентимиздан ёш бўлсам-да. Жуда қаттиқ чарчадим. Улар шу қадар ғайратлиларки, менга ўхшаганларнинг 10 таси ярим йўлда қолиб кетади. Айниқса, вилоятларга сафарга борганда. Соат 8:30 да аэропортда бўлишимиз керак эди. Бунинг учун соат 6:30-7:00 да уйғониш зарур. Ярим соат ичида биз, 8:30 да — Президент келарди. Самолётга ўтириб учамиз. Самолётдан тушишимиз билан кортежга ўтирамиз ва қилинадиган ишларнинг режали дастури жуда зич тузилган бўлади”, - дея тан олади Алламжонов.
Унинг сўзларига кўра, президент ҳатто йўлда ўтган ҳар бир дақиқани самарали фойдаланишни талаб қилади.
“Сиз тасаввур қилолмайсиз, биз ҳатто сув ёки чой ичмаймиз, овқатланмаймиз, дам олмаймиз — трапдан тушишимиздан, объектларга боришни бошлагандан то тунгги 12 гача ишларни тугатмагунимизча”, - дейди у.
“Буни тасаввур қила оласизми? Биз ҳолдан тоямиз, президент эса ҳали тетик. Президент халқимиз билан мулоқот қилганда одамларнинг муҳаббатлари ва қўллаб-қувватлашларини ҳис қилиб, кучга тўлсалар керак. Бу эса ишлашга рағбат беради. Объектларга бориб келгандан сўнг, 3-4 соат давом этадиган йиғилиш бошланади. Унда муҳим ва долзарб масалалар ҳал қилинади. Тунгги соат 12 да мажлисдан чиқамиз, чарчаганмиз ва президент эса тетик ҳолда 10-15 дақиқа тамадди қилиб, телевизор орқали янгиликларни кузатадилар, матбуотни ўқийдилар. Мана шундай ақлбовар қилмас режим”, - дея фиклари билан ўртоқлашади Алламжонов.
Эслатиб ўтамиз, Комил Алламжонов 2017-2018 йилларда давлат раҳбарининг матбуот котиби сифатида фаолият юритган.