ТОШКЕНТ, 28 июн — Sputnik. Туркманистонда юк автомобили ва поезд тўқнашиши оқибатида Ўзбекистон фуқароси жароҳатланди.
Мамлакатнинг Туркманистондаги Элчихонаси берган маълумотга кўра 2019-йилнинг 25-июнь куни ҳимояланмаган темир йўл ўтиш жойида юк автомобили поезд билан тўқнашиб кетиши оқибатида ҳайдовчи, Ўзбекистон фуқароси Р.А. жароҳатланган.
“У Аҳал вилояти Бозмейин шифохонасига жойлаштирилган. Унинг ҳолати қониқарли деб баҳоланмоқда”, - дейилади ТИВ хабарида.
Ҳозирда ҳодисанинг барча тафсилотларини аниқлаш ҳамда жароҳатланган фуқарога зарур гуманитар ва консуллик-ҳуқуқий ёрдам кўрсатиш учун элчихона ходимларини касалхонага юборишни режалаштирмоқда.
Консуллик-ҳуқуқий департаменти Туркманистон ҳудудида бўлиб турган Ўзбекистон фуқароларига улар зарур ҳолатларда Ўзбекистоннинг Ашхобод шаҳридаги Элчихонасига қуйидаги телефон рақами орқали мурожаат қилишлари мумкинлигини эслатиб ўтган: +993-12-36-90-55.