Бундан роппа-роса 220 йил аввал, 1799 йил 6 июнда буюк рус шоири Александр Пушкин таваллуд топган. Ушбу муҳим сана муносабати билан Россиянинг Ўзбекистондаги элчиси Владимир Тюрденев тошкентликлар билан биргаликда Пушкин ҳайкали пойига гул қўйди, Россотрудничество эса республикада рус тили ва маданиятини асраб-авайлаш, ривожлантириш ва оммалаштиришга ҳисса қўшган кишиларни тақдирлади.
Рус шоири ижоди ўзбекистонликлар ўртасида юксак қадрланади. Қайд этиш жоизки, Тошкентда Пушкин кўчаси, майдони, ёдгорлиги, шунингдек, шоир номи билан аталган метро станцияси мавжуд.
Куни кеча Наманганда “Эзгу илҳом париси” кўрик-танлови бўлиб ўтди. Унда иштирок этган ўқувчилар ва талабалар Пушкин ижодидан намуналар ўқишди ҳамда унинг портретига гул қўйишди.
Ўтган йили Ўзбекистоннинг икки таниқли маданият ходими – Александр Файнберг ва Владимир Шапиро – Россия Федерациясининг давлат мукофоти – Пушкиннинг медали билан тақдирланди. Медаль Россия билан маданий алоқаларни ривожлантиришга, шунингдек, рус тили ва маданиятини сақлаб қолишга катта ҳисса қўшган хорижий давлатларнинг фуқароларига топширилади. Ушбу мукофотга 10 нафар ўзбекистонлик сазовор бўлди. Республика Пушкин медали совриндорлари сони бўйича мамлакатлар ўртасида етакчига айланди.