ТОШКЕНТ, 23 май – Sputnik. “RAVON Racing Team” 19-20 май кунлари Богордск шаҳри яқинида жойлашган “Нижний Новгород ҳалқаси” пойга йўлида бўлиб ўтган Россия Ҳалқа чемпионатининг навбатдаги босқичида ғалаба қозонди, деб хабар қилмоқда Sputnik мухбири.
Пойгада махсус тайёрланган иккита Ravon Nexia R3 автомобиллари иштирок этди. Янги автомобил ва олдин катта муваффақиятларга эришмаган пойгачининг ушбу ғалабаси ҳақиқий сенсация бўлди, десак муболаға бўлмайди. Ахир унинг рақиблари ўта кучли жамоалар эди-да: “Академия ралли”, “С-логистик”, “Suvar motorsport”.
Ушбу ғалабанинг эътиборли томони шундаки, пойгага энди кириб келган янги жамоа ва машҳур бўлмаган пойгачи - Ефим Гантмахер “Туринг лайт” классининг етакчиси, тажрибали пойгачи, 5 маротаба Россия чемпиони - Владимир Черевандан ғалабани юлиб олди. Буни жамоанинг қисқа вақт ичиди эришилган катта ютуғи деб эътироф этиш мумкин.
“RAVON Racing Team” автомобилларини Самара шаҳрида жойлашган “TEAM80 Motorsport Engineering” инженерлари томонидан тайёрланди. Эришилган натижалар автомобиллар жуда яхши тайёрланганини намойиш қилди.
Пойга қандай ўтганини қуйида томоша қилишингиз мумкин.