ТОШКЕНТ, 13 апр — Sputnik. Тошкентнинг Шайҳонтоҳур туманида Daewoo Matiz ҳайдовчиси беш яшар болакайни босиб кетди, деб хабар бермоқда Тошкент ИИББ матбуот-хизмати.
Хабарда айтилишича, фожиа куни кеча Беруний кўчасида 21:00ларга яқин юз берган.
Болакайни босган ҳайдовчи ЙТҲ жойидан қочиб кетган.
Дастлабки маълумотларга кўра, болакай ота-она рухсатисиз кўчага чиққан ва қаровсиз қолгач, серҳаракат трассани кесиб ўтаётган бўлган. Авария оқибатида бола оғир тан жароҳати олиб, касалхонада вафот этган.
Ҳодиса жойидан яширинган ҳайдовчи тез орада қўлга олинган. У 27 яшар Илёс И. эканлиги айтилмоқда. Авариядан сўнг, ҳайдовчи автомобилни Кўкча масжиди яқинидаги маҳаллалардан бирида қолдириб, яширинишга уринган, аммо тезда қўлга олинган.
Ҳозирда тергов олди текширувлари олиб борилмоқда.