ТОШКЕНТ, 24 мар — Sputnik. Ўзбекистон Давлат Божхона қўмитаси мутахассислари “Навоий” назорат текширув пунктида Россияда ўғирланган автомобилни бошқариб келаётган Россия фуқаросини тўхтатиб қолишди, деб хабар қилмоқда ИИВ матбуот хизмати.
“Навоий” чегара-назорат постида Божхона қўмитаси ходимлари томонидан ўтказилган тезкор чоралар натижасида, Россия фуқароси бошқариб келаётган автомобиль Toyota Camry олдин Россия ҳудудида ўғирлангани аниқланди. Ҳайдовчи қўлга олинди. Божхона қўмитаси томонидан жиноят иши очилди. Тергов ишлари олиб борилмоқда”, - дейилган хабарда.
Ушбу иш юзасидан Россия Федерациясининг тегишли органларига маълумотнома юборилган.
20 март куни Тошкент яқинидаги "Ғишткўприк" чегара-назорат пунктида Россиядан ўғирланган Hyundai тўхтатиб қолингани ҳақида хабар берган эдик. Эслатиб ўтамиз, Ўзбекистонда автомобиль ўғирлаш жинояти учун 5 йилдан 20 йилгача қамоқ жазоси берилади.