ТОШКЕНТ, 18 мар – Sputnik. Соғлиқни сақлаш вазири Алишер Шадманов Ўзбекистон Бош прокурорга мурожаат қилиб, хизмат вазифасини бажараётган тиббиёт ходимларига қилинган тажовуз учун жавобгарликни кучайтиришни талаб қилди, деб ёзмоқда “Халқ сўзи” нашри.
Хусусан, 2017-2018 йилларда Ўзбекистонда шифкорларга тажовуз қилиш ҳолатлари 300 маротаба қайд этилган. Жиноят Кодексида ана шундай қонунбузарликка қарши моддалар аниқ ва равшан белгиланмаганлиги туфайли аксарият ҳолларда қонунбузарлар енгил жарималар билан жазодан қутилиб қолмоқда.
Эслатиб ўтамиз, 2019 йилнинг 29 январида Соғлиқни сақлаш вазирлиги Норматив-ҳуқуқий ҳужжатлар лойиҳалари муҳокамаси порталига тиббиёт ходимига бемор ёки унинг қариндошлари томонидан тажовуз қилиш ёки тан жароҳати етказиш каби қилмишларни Жиноят кодексининг 277-моддаси (безорилик) билан квалификация қилиб, ушбу ҳаракатларни оғирлаштирувчи ҳолат сифатида баҳолашни белгилайдиган қонун лойиҳасини жойлаштирган эди. Айни дамда ушбу ҳужжат тегишли муассалар кўригидан ўтмоқда.