ТОШКЕНТ, 6 янв — Sputnik. Ўзбекистонлик Алан Абдуллаев ФВВ ходимлари келишидан олдин саккиз кишига вайроналар остидан чиқишга ёрдам берди, деб хабар қилди "Комсомольская правда" нашри.
Хабарда айтилишича, 31 декабрь куни эрта тонгда Алан Абдуллаев намоз ўқишга тайёргарлик кўраётганди. Ўшанда, маҳаллий вақт билан соат 06:00лар атрофида турар жойда портлаш содир бўлди.
Йигит дарҳол кийимларини ўзгартириб, кўчага югуриб чиққан.
У одамларни вайроналар остидан чиқариб олишни бошлаб, ёнаётган ва қулаши мумкин бўлган квартиралардан кишиларни чиқарган.
“Саккиз кишига ёрдам бердик: икки инсонни ФВВ ходимларининг ёрдамисиз чиқариб олдик, болали аёл ва аёл ёнидаги киши, яна уч киши”, - деди Алан.
“Мен одамларни топганимда, у ерда ёнғин юзага келганди. Мен ўта олмадим. Менга ўт ўчиргич беришди. Ўчириб, ичкарига кирдим, кимнидир тирик ҳолда топдим. Шундан кейин кириб-чиқишни бошладим. Бу бироз қўрқинчли эди, лекин мен ёрдам беришга ҳаракат қилдим”, - деб қўшимча қилди А.Абдуллаев.
Эслатиб ўтамиз, 31 декабрь куни эрталаб соат 4 да Магнитогорскда маиший газ портлаши оқибатида ўн қаватли уйнинг подъездларидан бири қулаб тушди.
ФВВ қутқарув операциясини якунига етказди, вайрон бўлган бино уюмлари остидан қутқарувчилар 39 нафар қурбон жасадини олиб чиқдилар.