ТОШКЕНТ, 15 июл – Sputnik. Бугун, 15 июль куни тонгда ўзбекистонлик боксчи Шаҳрам Ғиёсов ўзининг профессионал боксдаги учинчи жангида мексикалик Даниэл Эчеверрияни мағлубиятга учратди. Бу ҳақда Ўзбекистон Миллий олимпия қўмитаси матбуот хизмати хабар берди.
Жанг 1-раунднинг ўзидаёқ якунига етди. Шаҳрамнинг кучли зарбасидан Даниэл нокаутга учради ва жангни давом эттира олмади.
Шу тариқа Шаҳрам проф боксдаги ўзининг 3 ғалабасига эришди.
Шунингдек, Фазлиддин Ғоибназаров америкалик боксчи Кевин Жонсонга қарши рингга кўтарилди ва 78:74 ҳисобида ғалаба қозонди.
Муроджон Аҳмадалиев ўзининг навбатдаги жангида аргентиналик Луис Фернандо Молинага қарши рингга чиқиб, очколар ҳисобига кўра ғалабани қўлга киритди.
Ғоибназаровнинг профессионал рингдаги ғалабалари сони 5 тага етди, Муроджон Аҳмадалиев учинчи ғалабасига эришди.