ТОШКЕНТ, 7 июн — Sputnik. Ўзбекистон президенти Шавкат Мирзиёев 2018 йил 8-10 июн кунлари Хитой Халқ Республикасида бўлиб, Шанхай ҳамкорлик ташкилоти Давлат раҳбарлари кенгашининг Циндао шаҳрида ўтадиган ўн саккизинчи мажлисида иштирок этади, деб хабар қилди президент матбуот хизмати.
Саммитда ташкилот фаолиятини янада такомиллаштириш, минтақавий хавфсизлик, иқтисодий ва инвестициявий шерикликни кенгайтириш, транспорт-коммуникация соҳасидаги алоқаларни фаоллаштириш масалалари ҳамда кўп томонлама ҳамкорликнинг бошқа жиҳатлари муҳокама қилинади.
Ўзбекистон раҳбари ШҲТ саммити доирасида икки томонлама учрашувлар ҳам ўтказади.
Илгарироқ Россия президенти Владимир Путин 9 июн куни ШҲТ саммити майдонида Ўзбекистон президенти Шавкат Мирзиёев билан икки томонлама учрашув ўтказиши ҳақида хабар бергандик.
Айни вақтда ШҲТга аъзо мамлакатлар: Россия, Хитой, Покистон, Ҳиндистон, Қозоғистон, Қирғизистон, Тожикистон, Ўзбекистон.
Афғонистон, Беларус, Эрон ва Монголия кузатувчи-давлатлар мақомига эга.