ТОШКЕНТ, 12 май — Sputnik. Эртага Рио Олимпиадаси чемпиони Фазлиддин Ғоибназаров профессионал боксдаги тўртинчи жангини ўтказади.
Ушбу жангда ўзбекистонлик боксчига мексикалик Хесус Силвейра рақиблик қилади. Сакиз раундлик жанг Нью-Йоркдаги Мэдисон Сквер Гарденда бўлиб ўтади.
Фазлиддин профессионал рингда шу кунгача учта жанг ўтказиб, уларнинг барчасида ғалаба қозонган.
Унинг рақиби Хесус Силвейра эса 15та жанг ўтказган ва шуларнинг 8тасида ғалаба қозонган, беш жангда мағлубиятга учраган ва яна иккита жангда дуранг қайд этган.