ТОШКЕНТ, 20 мар — Sputnik. Ўзбекистонда саккиз йиллик қамоқ жазосидан сўнг ҳуқуқ ҳимоячиси Ғайбулло Жалилов озодликка чиқди, деб хабар қилмоқда Sputnik Ўзбекистон мухбири.
Ўзбекистондаги Америка элчихонаси Жалиловнинг озодликка чиқарилиши муносабати билан ўз расмий баёнотини эълон қилди.
"Америка Қўшма Штатлари фуқаролик жамияти фаоли Ғайбулло Жалиловнинг озод этилишини олқишлайди. 2009 йили хавфсизликка алоқадор масала ва рўйхатдан ўтмаган диний ташкилотга аъзоликда айбланиб, озодликдан маҳрум этилган Жалилов доим айбсиз эканини айтиб келган. 2013 йили, БМТнинг Ҳибсга олиш ва ушлаб туриш бўйича ишчи гуруҳи Жалиловни озод этишга чақирганди. Қўшма Штатлар бу қарорни ҳамда суд тизимида ошкораликни кучайтириш ва барча фуқаролар учун қонунга мувофиқ адолатли муносабатларни такомиллаштириш бўйича ислоҳотларни қўллаб-қувватлайди", — дейилади баёнотда.