ТОШКЕНТ, 6 фев — Sputnik. Миллий олимпия қўмитаси "Uzreport TV" телеканалига XXIII қишки Олимпия ўйинларининг эксклюзив ҳуқуқини расмий сотиб олиш таклифи билан чиқди. Телеканал бу таклифни маъқуллаб, тегишли келишувга эришди ва Олимпия ўйинлари трансляциясининг эксклюзив ҳуқуқини сотиб олди, деб хабар қилди uzreport.news.
Мазкур олимпиада каби йирик жаҳон аҳамиятидаги мусобақаларни трансляция килиш ҳуқуқларига амал қилган ҳолда кўрсатилиши халқаро майдонда, шу жумладан, спорт ҳамжамиятида Ўзбекистон ва ўзбек спорти мавқеини, имиджини янада кўтариши аниқ.
Ўзбекистонлик спорт ихлосмандлари Олимпия ўйинларини айнан ушбу телеканал орқали томоша қилиш имкониятига эга бўлишади.
Маълумот учун, ишни профессионал тарзда ташкил қилган "UZREPORT TV" телеканали бунга қадар футбол бўйича Европа чемпионлар лигаси, Европа лигаси, Англия Премьер-Лигаси, Испания Ла-Лигаси, Евро-2016, шунингдек, бокс бўйича Германиянинг Гамбург шаҳрида ўтказилган жаҳон чемпионати ва қишки Осиё ўйинларининг трансляция ҳуқуқини харид қилганди.