ТОШКЕНТ, 28 янв — Sputnik. Тожикистон мамлакатга “ҳалол” сертификатига эга бўлмаган гўшт маҳсулотлари олиб киришни расман таъқиқлади, деб хабар қилмоқда Sputnik Тожикистон.
Ушбу чекловлар ҳақида Тожикистон ҳукумати барча хорижий ҳамкорларига огоҳлантирув хати юборди. Бундан буён фақат Тожикистон ҳукумати томонидан берилган аккредитацияси бўлган хорижий корхоналаргина ўзининг гўшт маҳсулотларини Тожикистонга олиб кириши мумкин.
“Аккредитация олиш учун бизнинг мутахассислар хорижий корхоналарда маҳсулот ишлаб чиқариш шароитларини ўз кўзлари билан кўришлари керак. Ундан ташқари маҳсулот “ҳалол” сертификатига эга бўлиши керак. Фақат ана шу талабларга жавоб берадиган ишлаб чиқарувчиларгина ўз маҳсулотини Тожикистонга олиб кириш ҳуқуқига эга бўлади”, — дейилган хабарда.
Эслатиб ўамиз, яқинда CrescentRating компанияси томонидан тузилган Global Muslim Travel Index, (Ҳалол туризм рейтинги) бўйича Тожикистон дунёда 26чи ўринни эгаллаган эди.
Ҳалол (рухсат берилган) гўшт – мусулмон динида истеъмол қилишга рухсат берилган гўшт тури. Қуръонда айтилишига кўра, ўлик ҳайвонлар, бўғиб ўлдирилган ҳайвонлар ва чўчқа гўшти мусулмонлар томонидан истеъмол қилинмаслиги керак.