ТОШКЕНТ, 9 янв – Sputnik. Парламент, сенатор ёки депутат сўровини кўриб чиқишда қонунбузарликларга йўл қўйган мансабдор шахслар энг кам иш ҳақининг 3 дан 7 бараваригача жарима билан жазоланади.
Бу борада Ўзбекистон Маъмурий жавобгарлик тўғрисидаги Кодексига тегишли қўшимча киритилди, деб ёзади РИА Новости.
Ўзгартишга мувофиқ, мансабдор шахсларнинг парламент сўровини, сенатор ёки депутат сўровини кўриб чиқишдаги қуйидаги ғайриқонуний ҳаракатларига нисбатан жарима солинади:
сўровни кўриб чиқмасдан қолдириш; сўровни кўриб чиқиш муддатларини узрли сабабларсиз бузиш; сўров юзасидан била туриб нотўғри маълумотларни қасддан тақдим этиш.
Сўровларни кўриб чиқиш муддати — агар бошқа муддат белгиланган бўлмаса, 10 кун.